သာဓုခေါ်ခြင်းအကျိုး
ဗုဒ္ဓဘာသာဝင်တို့သည် “အလှုရေစက် လက်နဲ့မကွာ” ဆိုရလောက်အောင် ကုသိုလ်ကောင်းမှု ပြုခြင်း၌ မွေ့လျော်ကြပေသည်။ ကောင်းမှုကုသိုလ် တစ်ခုခုပြုတိုင်း အမျှဝေခြင်း၊ သာဓု ခေါ်ခြင်း ဆိုသော အမှုတို့ကို ပြုလုပ်လေ့ရှိကြပါသည်။ ဤနေရာတွင် အမျှဝေခြင်းလေးမျိုးရှိပါသည်။
(၁) ဒါနကုသိုလ်ကို အမျှဝေခြင်း
(၂) သီလကုသိုလ်ကို အမျှဝေခြင်း
(၃) သမထကုသိုလ်ကို အမျှဝေခြင်း
(၄) ၀ိပဿနာကုသိုလ်ကို အမျှဝေခြင်း။
အမျှဝေသောပုဂ္ဂိုလ်များက ၄င်းလေးမျိုးကို ပေးဝေပါသော်လည်း သာဓုအနုမောဒနာခေါ်ဆိုကြသော သူတို့မှာ ဒါနကုသိုလ်တစ်မျိုးသာ ရရှိကြသည်ဟုဆိုပါသည်။ ဒါနကုသိုလ်ကို သာဓုခေါ်လျှင် ဒါနကုသိုလ်ပင် ရသည်၊ သီလကုသိုလ်ကို သာဓုခေါ်လျင်လည်း ဒါနကုသိုလ်ပင်ရသည်၊ သမထကုသိုလ်ကို သာဓုခေါ်လျင်လည်း ဒါနကုသိုလ်ပင်ရသည်၊ ၀ိပဿနာကုသိုလ်ကို သာဓုခေါ်ဆိုပါကလည်း ဒါနကုသိုလ်ပင် ရပါသည်။
ဤနေရာတွင် အမျှဝေခြင်း၊ သာဓုခေါ်ခြင်းတို့နှင့် ပတ်သက်၍ ပျားကုန်သည် ညီနောင်သုံးယောက် အကြောင်းကိုလေ့လာဖတ်ရှုသင့်ပါသည်။ ညီငယ်ဖြစ်သူက ပစ္စေကဗုဒ္ဓါအရှင်မြတ်အား ပျားရည်ကို လှုဒါန်းပြီး သူဆုတောင်းတာက “ဘုရားတပည့်တော်သည် ဤကောင်းမှုကြောင့် ဤဇမ္မူဒီပကျွမ်း၌ အထက်တစ်ယူဇနာ၊ အောက်တစ်ယူဇနာ အာဏာပျံ့နှံ့ရပါလို၏ အရှင်ဘုရား” ဆုတောင်းလိုက်တယ်။ သူ့အကိုကြီး နှစ်ယောက်က ထိုကောင်းမှုကို ၀မ်းမြောက်ဝမ်းသာ သာဓု အနုမောဒနာ ပြုကြပါသတဲ့။ ၄င်းကုသိုလ်ကံကြောင့်ပင်လျှင် အလှုရှင်ဖြစ်သော ညီငယ်လေးက အသောကမင်း ဖြစ်လာသည်၊ သာဓုခေါ်သော အကိုနှစ်ယောက်တို့တွင် တစ်ယောက်က သီဟိုဠ်ကျွန်းမှာ ဒေ၀ါနံပိယတိဿမင်း ဖြစ်လာသည်။ အကိုအကြီးဆုံးကတော့ နိဂြောဓ ရဟန္တာ မထေရ်မြတ် ဖြစ်လာပါသည်(သာရတ္တ)။
ရုရှားသာသနာပြုဆရာတော်
၁၅/၂/၂၀၁၁